ТАВАНТОЛГОЙ-ГАШУУНСУХАЙТ ЧИГЛЭЛИЙН 240 КИЛОМЕТР  ТӨМӨР ЗАМЫН ТӨСӨЛ

Тавантолгой-Гашуунсухайт чиглэлийн төмөр зам Өмнөговь аймгийн Цогтцэций, Баян-Овоо, Ханбогд сумын нутаг дэвсгэрт байрлах бөгөөд Тавантолгой уурхайгаас Гашуунсухайт боомт хүртэл 240 орчим километр гол замтай, 2 өртөө, 5 зөрлөгтэй байх юм.  Уг төмөр зам баригдсанаар манай улс жилдээ 30 сая тонн коксжих болон эрчим хүчний нүүрсийг тээвэрлэн экспортлох боломжтой. 
Тус төмөр зам ашиглалтад орсноор БНХАУ руу экспортлох нүүрсний экспортын Монголын нутаг дэвсгэрийн доторх тээврийн зардал тонн тутамд 8 ам.доллар болж, өнөөгийн авто замаар хил хүртэл тээвэрлэж буй зардал болох 32 ам.доллараас 24 ам.доллараар буюу 4 дахин буурч, төмөр замын боомтоор дангаараа жилд 30 сая тонн хүртэлх хэмжээний нүүрс экспортлох боломж бүрдэж нүүрс олборлолт, нийлүүлэлтийн хэмжээ 2-3 дахин нэмэгдэж эдийн засгийн үр өгөөж нэмэгдэх юм. 

Тавантолгой-Гашуунсухайтын төмөр зам ашиглалтад орсоноор төмөр замаар дамжуулах нүүрс, зэсийн экспортыг дэмжиж, БНХАУ-ын нутаг руу тээвэрлэх, цаашлаад тус улсын далайн боомтоор дамжин гуравдагч орны зах зээл рүү тээвэрлэлт хийх боломж бүрдэж Монгол Улсын уул уурхайн компаниуд дэлхийн зах зээлд хямд үнээр өрсөлдөх боломжтой болно. 

    НИЙГЭМ, ЭДИЙН ЗАСАГТ ҮЗҮҮЛЭХ НӨЛӨӨ 

  • Нүүрс экспортыг дэмжсэнээр Монгол Улсын нутаг дэвсгэр дэх тээврийн өртөг буурч, өрсөлдөх чадвар нэмэгдэнэ. 
  • Бэлчээр сүйтгэх, тоосжилт, дуу шуугиан, хөрс болон агаарын бохирдлын асуудал үлэмж багасна. 
  • Авто тээврийн осол, зөрчлийг бууруулж, иргэдийнхээ амь нас, эрүүл мэндийг эрсдлээс сэргийлэн, хөдөлгөөний аюулгүй байдлыг бүрэн хангана. 
  • Тавантолгойн бүлэг орд орчмын уурхайнуудын олборлолтын хэмжээг 2-3 дахин нэмэгдүүлэх боломжтой болно. 
  • Байнгын 1900 орчим ажлын байр бий болно. 
  • Дотоодын нүүрс тээврийн зардлыг 4 дахин бууруулж тонн тутамд 8 ам.доллар болгож, өнөөгийн авто замаар хил хүртэл тээвэрлэж буй зардал төмөр замын боомтоор жилд 30 сая тонн хүртэл хэмжээний нүүрс экспортлох боломжтой болно. 

Улсад жилд 20 – 28 сая ам.долларын татвар төлөхөөс гадна 25 жилийн хугацаанд ойролцоогоор 1 тэрбум ам.долларын ногдол ашиг Засгийн газарт өгсөнөөр улс орныхоо эдийн засгийн өсөлтийг бодитойгоор дэмжинэ.
 

#Сэтгэгдэл (0)

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Зөрчсөн сэтгэгдэлийг админ устгах эрхтэй.