Монгол Улсын Шадар сайдын 2025 оны 139 дүгээр тушаал, Онцгой байдлын ерөнхий газрын даргын 2025 оны 10 дугаар сарын 3-ны өдрийн А/389 дүгээр тушаал, мөн “Гамшгийн тухай” хуулийн 34.2.2 дахь заалтын дагуу 2025 оны 10 дугаар сарын 21-ний өдрийн 05:00–06:00 цагийн хооронд улсын хэмжээнд Гамшгаас хамгаалах бэлэн байдлын үзлэг зохион байгуулагдлаа.

Энэхүү үзлэгийн хүрээнд “Тавантолгой төмөр зам” ХХК-ийн нийт ажилтан, албан хаагчид оролцож, өглөөний бэлэн байдлыг ханган ажиллав. Компанийн Гүйцэтгэх удирдлаар удирдуулсан гамшгаас хамгаалах мэргэжлийн ангийг байгуулан, 7 бүлэг, 7 хэсэг бүхий зохион байгуулалтын бүтэцтэйгээр үйл ажиллагаа явуулж байна.

Бэлэн байдлын үзлэгийн үеэр ажилчдын хувцас хэрэглэл, хамгаалах хэрэгсэл, үүрэг гүйцэтгэлийн бэлтгэл, тоног төхөөрөмжийн ашиглалтын байдал зэрэг үзүүлэлтүүдийг шалгасан бөгөөд компанийн удирдлагын баг, хэлтсийн дарга нар газар дээр нь хяналт тавин ажиллалаа.

 “Тавантолгой төмөр зам” ХХК нь гамшгаас хамгаалах, аюулгүй ажиллагааны чиглэлээр байгууллагын бэлэн байдлыг тасралтгүй сайжруулах, аливаа эрсдэлийн үед хариу арга хэмжээ авах чадварыг дээшлүүлэх бодлого баримталж, хариуцлагатай, зохион байгуулалт сайтай ажиллаж байна.