“Эрдэнэс Тавантолгой” ХК энэ сарын 9-өөс эхлэн Монголын хөрөнгийн биржээр дамжуулан нүүрсийг цахимаар худалдаалж эхэлсэн бөгөөд цаашид биржээр арилжаалсан нүүрсийг төмөр замаар тээвэрлэх ажлыг эрчимжүүлэх, Тавантолгой-Гашуунсухайт чиглэлийн төмөр замаар экспортын нүүрс тээврийн хэмжээг нэмэгдүүлэх зорилгоор “Эрдэнэс Тавантолгой” ХК, “Тавантолгой төмөр зам” ХХК хооронд өнөөдөр /2023.02.15/ “Тээвэрлэлтийн үйлчилгээ үзүүлэх” гэрээг үзэглэлээ. Гэрээнд “Эрдэнэс Тавантолгой” ХК дахь Засгийн газрын Онцгой бүрэн эрхт төлөөлөгч Ж.Ганбат, “Тавантолгой төмөр зам” ХХК дахь Засгийн газрын Онцгой бүрэн эрхт төлөөлөгч Н.Мягмар нар гарын үсэг зурж, баталгаажуулав.
   Уг ажлын хүрээнд 2023 онд “Эрдэнэс Тавантолгой” ХК-тай нүүрсийг төмөр замаар тээвэрлэхээр харилцан тохиролцсон бөгөөд ингэснээр Тавантолгой-Гашуунсухайт чиглэлийн төмөр замаар хоногт 6400 тонн экспортын нүүрс тээвэрлэх боломж бүрдэж байна. Үүний зэрэгцээ төмөр замаар ачаа тээвэрлэх технологит үйл ажиллагааг зүгшрүүлснээр “Тавантолгой төмөр зам” ХХК нь тээврийн үйлчилгээний орлогоор бие даан үйл ажиллагаа явуулах боломжтой болох юм.