“Тавантолгой төмөр зам” ХХК-ийн биеийн тамир, спортын “Бага наадам” сагсан бөмбөг, гар бөмбөг, хөлбөмбөг, дартс, ширээний теннис, шатар зэрэг 6 төрлөөр 2023.02.10-2023.02.12-ны өдрүүдэд зохион байгуулагдах бөгөөд нээлтийн үйл ажиллагаа 02.11-ний бямба гарагт Tiger спорт төвд боллоо.
    Энэ жил анх удаа зохион байгуулагдаж буй тус “Бага наадам”-ын нээлтийн үйл ажиллагаанд “Тавантолгой төмөр зам” ХХК дахь Засгийн газрын Онцгой бүрэн эрхт төлөөлөгч Н.Мягмар болон компанийн удирдлага, ажилтнууд, нийт баг тамирчид оролцов.

    Засгийн газрын Онцгой бүрэн эрхт төлөөлөгч Н.Мягмар “Бага наадам”-ыг нээж хэлсэн үгэндээ Монгол Улсын Ерөнхийлөгчийн 2022 оны 43 дугаар зарлигийн дагуу биеийн тамир спортыг хөгжүүлэх, биеийн тамир, спортоор хичээллэх орчин нөхцөлийг бүрдүүлэх, “Тавантолгой төмөр зам” компанийн ажилтнуудын спортын ур чадварыг дээшлүүлэх, биеийн тамир, спортоор дамжуулан ажилчдын эрүүл мэндийг хамгаалах, эрүүл амьдралын дадалд төлөвшүүлэх зорилгоор энэхүү спортын бага наадмыг зохион байгуулж байгааг тэмдэглээд, манай компанид Таеквондогийн дэлхийн аварга, Харуул хамгаалалтын хэлтсийн дарга Ө.Гантөмөр, Шатарын дэлхийн аварга шалгаруулах тэмцээний рапид төрлийн дэлхийн аварга, Вагоны аж ахуйн хэлтсийн пасспортын техникч Э.Амаржаргал тэргүүтэй спортын олон авьяастнууд байдгийг онцоллоо.
   Түүнчлэн, цаашид компанийн удирдлагууд, спортоор бусдыгаа манлайлдаг ажилтнуудтайгаа хамтран хамт олныхоо хэрэгцээнд нийцүүлэн биеийн тамир, спортын чиглэлийн үр нөлөөг дээшлүүлэх ажлуудыг зохион байгуулж, бие бялдрын хөгжил сайтай, эрүүл чийрэг, ёс суртахуунтай, спортоор тогтмол хичээллэдэг хамт олныг төлөвшүүлэх ажлыг хийж хэрэгжүүлэх нь зүйтэйг тэмдэглэв.
     Биеийн тамир, спортын “Бага наадам”-ыг цаашид уламжлал болгон зохион явуулах бөгөөд энэ удаагийн тэмцээнд нийт 200 орчим тамирчин хурд хүч, авхаалж самбаагаа сорин өрсөлдөж, хамгийн өндөр оноо авсан газар шилжин явах цомын эзэн болох юм.