Монгол Улсын Ерөнхийлөгчийн санаачилсан “Тэрбум мод” Үндэсний хөдөлгөөний хүрээнд манай компани 2023 оны хаврын тариалалтаар Тавантолгой-Гашуунсухайт чиглэлийн төмөр замын Тавантолгой өртөөнд хоёр төрлийн суулгац тарьсан. Төмөр замын хамгаалалтын хашаа дагуу болон өртөөний барилгын гадна цэцэрлэгжүүлэлт, ногоон байгууламжийн хүрээнд 1500 улиас, 600 сухай модны суулгац тарьж, ургалтын үеийн усалгаа, арчилгааг бүх газар, хэлтсийн ажилчид хийж гүйцэтгэж байна. Тариалалт хийсэн хөрсний үржил шимийг сайжруулах, модны ургалт, ногоон массыг нэмэгдүүлэхийн тулд гумины бордоогоор бордож байгаа нь үр дүнгээ өгч, энэ хаврын тариалалт ургалт сайтай байна.

Энэ жилийн хаврын тариалалтаар 2100 суулгац тарьсан бол ирэх намар нэмж 1900 суулгац тарихаар төлөвлөн ажиллаж байна.